صباح الخير او مساء الخير حسب توقيت ما بتشوفنا كل يوم حكاية جديدة وأمل جديد فى الجزء دا هنتكلم ونحكى عن قصص أمهات وأسر محتضنة للأطفال
حكاية كوكي
صباح الخير كل يوم حكاية جديدة وامل جديد💫⭐️ حكاية انهارده يوم من اصعب #يوميات أم حاضنه #كوكي اللي خلقت لاسرتها سعادة جديدة ومختلفة وسبب ان الاسر تفكر في احتضان طفل تاني وان عيلتهم تكبر اكبر واكبر 👨👩👧👦❤️
حكاية كوكي
في أصعب وقت وفترة في حياتي كان عدي علي زواجي ١٠ سنين وفقدت حملي لرابع مرة بدون اي أسباب واضحة.. ربنا طبطب علي قلبي وكانة بيقولي هعوضك بس بطريقتي مش لازم العوض يكون بالطريقة اللي عايزنها علي فكرة والله عوض ربنا أجمل واحسن من كل اللي بنتوقعة في عز تعبي النفسي والجسماني وانا عمرى ماكنت بفكر في الكفالة حتي اما كانت بتجيلي إشارات من ربنا مكنتش بشوف الإشارات دية لحد معرفت ان في بنت تم العثور عليها قريب مني❤️ فكلمت زوجي وانا مش عارفة ابدأ الكلام معاه ازاي مش عارفة رد فعلة هيكون ايه احنا عمرنا اصلا مااتكلمنا في ده ولا كان في بالنا وأول ما قولتة في بنت صغيرة عثروا عليها قالي ماتيجي ناخدها ⭐️ انا مكنتش مصدقة قولتة ياريت قالي اتواصلي مع الشخص اللي وجدها وانا هستاذن من الشغل واجيلك واتواصلت مع الشخص ده وربنا فعلا سخرلي الناس المحترمة كلها شوفت بنتي وشلتها وعيط وقولتها انتي بنتي خلاص❤️🌸 طبعا عرفت اني مقدرش اخدها كده وخلاص جريت علي الشئون الاجتماعية وجمعت الأوراق والطلبات كلها واتعطلت كتير كان الشيطان يقولي اكيد انتي متصلحيش ولا خلفة ولا كفالة اكيد ربنا شايف انك مش قد المسئولية وأول ما افكر في بنتي اللي كنت بازورها كل يوم واخدها في حضني كنت بقول مش هفقد الأمل ... واخيرا استلمت بنتي عندها ٧ شهور ودلوقتي عدي ٤ سنين من عمرى وانا ماما ربنا رزقنا بيها من حيث لا نحتسب . ربنا يديمها نعمة في حياتنا ويرزقنا برها ودلوقتي هيا اللي بتقولي عايزة اجيب اختي من بيت الأطفال (قصدها الدار) 👨👩👧👦 واعتبرتها إشارة جديده من ربنا وهبدء ان شاء الله في الإجراءات لتاني مرة واسرتنا تكبر بيهم ومعاهم❤️👨👩👧👦. وكوكي حبيت تقولكم رمضان كريم ⭐️ ادعولنا وافرحو لينا وشاركونا فرحتنا بااولادنا ... "مش مهم يكون من صلبك ، المهم يكون ابنك " انتظرونا كل يوم #حكايه_جديدة وامل جديد ....
حكاية محمد
بينا نختم معاكم رمضان بحكاية #محمد .. يوميات مختلفه وتلمس القلب وبنشوف وبنشعر فيها برحمة ربنا في حياة #اسرة _محمد بنوعدكم ان يومياتنا مش هتخلص وقصص الاحتضان هتزيد وكل يوم تحدي جديد وأمل جديد💫⭐️
حكاية محمد
السلام عليكم انا مامت محمد حابه احكلكو حكايتى و تجربتى مع الاحتضان ،انا ضيعت ١٦ سنه من عمرى ف زواج سابق ومحاولات للخلفه لم يكتب الله لها النجاح واتعرض عليا موضوع الكفاله لكن مكنش فى قبول منى( سبحان الله كل شئ بأوان) زوجى الحالى ربنا يكرمه ويباركله هو كمان كان له زواج سابق وكان عنده أسرة جميله لكن قدر الله أن يلقو ربهم جميعا اثر حادث اليم😭 و تزوجنا كان زواج سرييييع جدا كأن القدر بيقولنا يلا مفيش وقت تضيعوه اكتر من كده.. انا طبعا صارحته قبل الزواج بمشكله الخلفه وقولتله احنالسه ع البر و القرار قرارك لكن هو طمنى وقالى احنا هنعمل اللى علينا و اللى لينا نصيب فيه هنشوفه👍 و بدأت رحله جديده مع الدكاترة لمده سنه ونص فى غنى أنى احكلكو عن المتاعب و الحاله النفسيه و المصاااااااريف واخر ٢ دكاترة روحتلهم كان كلامهم واحد و هو أن الموضوع مستحيل و اخر واحد عرض علينا نسافر بره✈️ لكننارفضنا👎و قلنا خلاااااااص كفايه لحد كده! انا طبعا عارفه أن زوجى محتاج يبقى عنده ولو حتى طفل واحد عشان كده عرضت عليه أننا ننفصل أو يتجوز عليا بس هو رفض وقالى انا مش عايز حد غيرك😘 لحد يوم لاقيته بيقولى( احنا مش ناقصنا حاجه ف حياتنا غير أننا نبقا تلاته👨👩👧 عشان كده انا قررت نكفل طفله )لاقيت نفسى مش عارفه ارد و جت ف دماغى اسئله كتييير اوى هو انا هحبها؟ طب رد فعل الناس؟ طب هى هتبقى شبهنا ازاى؟ طب اهلنا هيتقبلو ده ؟طب لما تكبر هقولها ايه ؟و كأن فى شريط سينما بيعدى من قدام عينى شايفه فيه حياتى الجديدة #كل ده ف نفس اللحظه# المهم روحنا التضامن وقدمنا الطلب و حضرنا كل الورق المطلوب و الكشف النفسى وكنا كاتبين ف الورق بنت👧 بس مخبيش عليكو انا طول عمرى نفسى ف ولد 👦 و بعد شهرين طلع قرار اللجنه بالموافقة #كان قلبى حاسس# (على فكرة احنا خدنا استثناء من شرط ال ٣ سنين زواج و ده طبعا مراعاة لظروف زواجنا السابق) اول معرفنا بالموافقه واحده صحبتى الله يباركلها قالتلى على صفحة الاحتضان ف مصر ❤️و دخلت عليها و عرفت أن فى دكاترة متخصصين في موضوع الإرضاع وفعلا روحت لدكتورة و اخدت العلاج و عملت الجلسات و بقيت جاهزة لأرضاع بنتى🤱 انا بقا ف الفترة دى حضرت الاوضه و المستلزمات و كنت بتفرج على لبس البنات وانا مش مصدقه نفسى معقوله بعد السنيييين دى هدخل اشترى ومش هتفرج بس؟؟لكن أجلت الشراء لحد مشوف البنت واعرف جسمها اد ايه؟؟بس كلام ف سركو كنت برضه ف الخباثه كده ببص على لبس الولاد😂😂 المهم روحنا خدنا جواب المشاهدة و ابتدينا نلف على دور الأطفال يوم و اتنين و تلاته شوفنا فيهم بنات كتير بس المشكله انى مستنيه شعور معين يوصلنى عشان اقدر اقول ايوه هى دى بنتى لكن ده محصلش و كل مشوف ولد اشبط فيه لكن زوجى يرفض و نمشى😭 لحد مروحنا دار #اجمل دار ف الدنيا#سألنا من ع الباب على بنات و كان الرد أن الموجود دلوقتى ولاد بس و اخر بنت عندهم اتحجزت امبارح زوجى قالى( يلا نمشى ومنضيعش وقت) بس المديرة أصرت أننا ندخل وفعلا دخلنا لاقيتها بتقول (انا عندى ولد شبهك يا مدام) راح زوجى اتنرفز و قال( لأ لأ ولد لأ انا عايز بنت احنا دخلنا بس عشان منكسفكيش لكن ولد لأ)المديرة حاولت تهديه و تمتص غضبه و قالتله هو انت هتخسر حاجه؟؟ وطلعت جابت محمد اول مدخلت بيه علينا انا قلبى اتخطف و لاقيت زوجى قام نط و فط من مكانه وقالى هو ده هو ده انا قعدت اعيط مبقتش مصدقه لدرجه انى فضلت أقوله( انت متأكد متأكد ده ولد ) والله يا جماعه الموقف ده لو كان اتصور كنا اخدنا الاوسكار🏆 معقوله يا ربى تحققلى حلمى بالطريقة دى #انا مكنتش عايزة ازعل زوجى و لا اضغط عليه ف موضوع الولد عشان يبقى راضى عنى لغاية م ربنا راضانى# كان عنده وقتها ٣ شهور بس كان فى مشكله ف الشهادة الرقميع بتاعته وده اخر الاستلام لمده شهرين مش قادرة اقولكو الشهرين دول عدو عليا ازاى كنت بروح الدار يوم بعد يوم عشان اشوفه و ارضعه #ابني لحد يوم لاقيت زوجى بيتصل بيا قالى مبروك الشهادة الكمبيوتر طلع وخلاص هنسلم بكرة❤️❤️ يااااااااااه خلاص من بكرة ابنى ف حضنى كنت عايزة اصرخ اصوت ارقص ازغرط بس معرفتش اعمل كده عشان كنت ف الشغل و قلت ل زمايلى قعدو يعيطو و فرحو يمكن اكتر من فرحتي❤️ نيجى بقا لأحلى يوم ف عمرى طبعا احنا منمناش الليله اللى قبلها خالص و روحنا استلمنا محمد بقيت شايلاه وعايزة اخبيه جوايا كنت عايزة اجرى وخايفه ابص ورايا لحد مروحنا عند ماما #انا كنت متفقه مع اخواتى أنهم يتجمعو اليوم ده عند ماما و عملتلهم مفاجأة # اول مدخلت ب محمد من باب العمارة لاقيت الدنيا كلها اتملت زغاريط و اللى اغمى عليه و اللى عايز يشيله متهيألى كانو عايزين يشيلونى انا كمان🤣🤣 تانى يوم بقا عملناله حفله عقيقه محصلتش الناس كلها فرحانه و بيرقصو و الهيصه و الاغانى مسمعه للسما💃💃💃 و كمان يوم عيد ميلاده عملناله حفله ولا كأنه فرح ابن العمده😄😄 محمد دلوقتى عمره سنه و٣ شهور و عمرى انا يتحسب من ساعه م بقا ف حضنى و اللى فات ميتحسبش محمد ابنى كل حياتى روحى و نور عينى وعين باباه اللى مش عارف يجبله ايه ولا ايه👨👩👦 محمد فرخه بكشك عند العيله كلها و جده و جدته بيعشقوه مع أن الاحفاد ما شاء الله ربنا يزيد ويبارك بس محمد حاجه تانيه💗💗 كل اللى يشوفه يقولى دا حته منك كل الناس بتحبه حتى زمايلى ف الشغل معتبرينه ابنهم وكل شويه هدايا لعب و لبس🎁🛍️ طب مفيش حاجه ل ام محمد 😂😂 مش هقولكو طبعا على شقاوة الصبيان و السهر و التعب بس على قلبى زى العسل😘 لو تعب شويه بقعد جمبه اعيط و باباه يبقا هيتجنن عليه ولو ضحك كأن الدنيا كلها بتضحك😊 ربنا أراد يكرمنا ب محمد و يعوضنا بيه و يملى حضنى الفاضى ربنا يفرحنا بيه و يفرحه بينا و نشوفه احسن الناس🤲 ربنا يفرح كل الناس ب أولادها و ميحرم حد ابدا من نعمة الاطفال اللهم امين... “مش مهم يكون من صلبك ، المهم يكون ابنك "
حكاية أم محتضنة
وكل يوم تحدي جديد وامل جديد⭐️💫 ولتكملة للقصة ... واجابة سؤال ليه ؟ ليه تكفلي طفل وانتي عندك اولاد ...؟!
يوميات أم محتضنة
أنا أم لبنتين و ولد بين ١٥ و ١٢ سنة معنديش بفضل الله موانع للخلفة. بشتغل في وظيفة مرموقة و حياتي الحمد لله مشغولة مش فاضية.. قررت يكون ابني الرابع بالكفالة و الرضاعة. عندي حاجات كتير تتقال في رحلة تحقيق حلمي ده إنما أنا حجاوب هنا عن سؤال واحد هو.. ليه؟.. و ده يمكن يساعد حد غيري انه يحدد أولوياته و يمشي وراها.. لو عرفت ليه بشكل واضح فده بيسهل عليك و علي كل اللي حواليك و بيوفر معارك كتير.. الإجابة بالنسبالي كانت.. عشان نفسي في جوار الرسول صلى الله عليه وسلم و في قلبي تتردد "و من أحياها" و "لأن يهدي الله بك رجلا" عشان اكتشفت ان عندي طاقة حب كبيرة للتطوع في الأول وجهتها ناحية الحيوانات و بعدين النباتات و بعدين لقيتني شايفة الكفالة حل شامل و جميل أوي. عشان الكفالة الحقيقية مش فلوس و زيارة كل فترة و نسيبهم يواجهوا مجتمع مبيرحمش الضعيف. عشان أديله عيله و اخوات و أب و أم و سند حقيقي. عشان ده طريق صعب و طويل و بيصعب مع الوقت و مش أي حد يمشيه و أرجو يكون عملي خالص لوجه الله يقبلني بيه و يغفر ذلاتي. عشان ابني حيكون كنزي في الدنيا و الآخرة ده المسحة علي راس يتيم ليها أجر طب و الحضن و الدعم و السهر و الرفض و غيره. عشان لو فتحنا قلوبنا و بيوتنا ليهم مش حنشوف طفل مكسور و مقهور. عشان شفت بركة و خير كبير مجرد ما عزمت على الكفالة و قبل ما أمشي فيها خطوة واحدة و ظني بربنا انه كريم و من كرمه و لطفه انه هدانا لكدة. اخترت ولد مش بنت لأن الولد عند ١٨ سنة بيخرجوه من الدار و بيبدأ حياته لوحده تماما في سن صعبة بدون موارد. دي اجاباتي و اللي حددتها لنفسي و أتمني كل واحد بيفكر في الكفالة يلاقي إجاباته و يحسبها و يعقلها و يتوكل.
حكاية لوكا
مقدرناش ننهى يوميات أم محتضنه من غير حكاية لوكا ملك بنت لاسرة قوية جدا اب قوي ورائع و من اهم اعضاء فريق #الاحتضانفيمصر .. اب وام قررو يكونوا اسرة جميلة وكمان يساعدو كل من يريد الكفالة ... هتقدرو تلمسوا اد ايه الاسرة ديه تعبت لحد ما بقيت لوكا في حياتهم 💪🏻⭐️💫
حكاية لوكا
انا مامت لوكا انا متزوجه من 10 سنين وعرفني سبب تاخر الانجاب فى اول سنه وبدانا رحلة العلاج والعمليات ولم يحصل انجاب ونفسيا مدمرين وكمان مصاريف وفكرنا فى الكفالة من حوالى 4 سنين وسكتنا لغاية فى يوم احلى يوم بالنسبالي انا وجوزى عثرت على بنتي كانت عمرها ثلاثة اشهر❤️ وطبعا لحظة لما شوفتها عمرى ما هنساها شوفت فى عينها الامل انى اكون ماما ونظرتها ليه كانت بتقولى متسبنيش ولقيت جوزى بيقولى انى هكفلها ومكونتش مصدقة ان ربنا بعتهلى فى الوقت ده واول لما جوزى شليها ماسكت ايده يومها كانت تعبانة وبتعيط وجرينابيها اناوجوزى على الدكتور وكنا خايفين عليها جدا ❤️ وبدانا المشوار الطويل طويل جدااا اجراءات العثور والكفالةوكان اهم حاجة اننا منغضبش ربنا ونسجلها قانونى. الحمدلله مشينا الطريق الصح وعملنا محضر وصدر قرارمن النيابة بتسلمها لاحدى دور رعايه وكان هذاالقرار صعب جدا بالنسبالنا😢😢 حسيت كانى حد بياخد روحى منى وقد ايه كانت اصعب لحظات لما كنت اروح دور رعاية وهى تعيط وماسكه ايدى وتبصلى كانها بتقولى اوى تسبينى بس مكنش فيه اماكن والحمدلله وقعدنا سنة بنحاول نطلع شهادة الميلاد وفى نفس الوقت مشينا فى ورق الكفاله والموافقة جت قبل صدور شهادةالميلاد وكانت الصدمة اننا مش هينفع نعمل عقد الاستلام الا لما شهادة ميلاد تطلع ! وكان لازم تسلم لدار والدار هى اللي تطلع شهادةالميلاد وكنت بموت من جوايا كل اسمع الكلام ده من كذا حد وجوزى خد الورق وراح السجلات يحاول مرة تانية وتابته ورابعه كان بس موقف حياته علشان ملك وورقها !  بعد ما الورق اترفض اول مرة ولحسن حظنا وبفضل ربنا علينا وجدنا موظفة جاية انتداب من الاداره سهلت الاجراءات وقدمنا الورق وتم قبول الورق ومدى احساسى والفرحه اللى كنت حاسه بيها وقتها لما مسكت الشهادة فى ايدى حسيت انى ربنا عوضنى خيرعن تعب السنين اللى فاتت❤️ وكملنا اجراءات الكفالة وبدات فى كورس الارضاع والحمدلله قومت بارضاعها و وهى فى حضنى ومامتى من اول لما شفتها هى وبابا اتعلقوا بيها جدا و دايما ماما تقولى لو كنتى جايبها من بطنك مكنتش هحبها اكتر من لوكا وكنت ببقى فرحانه جدا جدا👨👩👧👨👩👧 كل اللى حواليه عارفين انى كفالها ودلوقتي عندها سنة ونص وعرفت معنى الامومة بجد معاها وقولت يارتنى كنت فكرت في الكفالة من اول سنة بدل تعب العمليات والاعصاب وسنين الحزن بقيت بقعد مع اى حد يحكى على اولاده وانا زيهم كنت الاول بسكت واتكسف وازعل دلوقتى لا واجمل الاوقات وهى معانا بنشترى زينة رمضان ولبس العيد قد ايه كانت فرحانه وبتختار معانا كنا مبسوطين جدا و حاسنا اننا عاشين بجد بعد لما كنا بنسكت بالايام منكلمش والحزن ملى قلوبنا دلوقتى انا معنديش وقت اقعد نتكلم فيه وبالنسبالنا هى اجمل هدية من ربنا وعوض ربنا لينا ❤️👨👩👧 انا اسفه على الاطالة بس ده جزء من حكايتى انا ولوكا ربنا يرزق كل مشتاق يارب.. مش مهم يكون من صلبك ، المهم يكون ابنك " انتظرونا كل يوم #حكايه_جديدة وامل جديد ....
يوميات ام محتضنة "الاردن"
قصتي بدأت لما تزوجت وربنا ما رزقني اولاد ودخلت رحلة العلاجات وطفل الانابيب اكثر من خمس مرات ولكن ما في نصيب والحمدلله على كل حال وبعد عشر سنوات زواج فكرت بالاحتظان لكن زوجي رفض،
يوميات ام محتضنة "الاردن"
قصتي بدأت لما تزوجت وربنا ما رزقني اولاد ودخلت رحلة العلاجات وطفل الانابيب اكثر من خمس مرات ولكن ما في نصيب والحمدلله على كل حال وبعد عشر سنوات زواج فكرت بالاحتظان لكن زوجي رفض، واستمريت في القناعه سبع سنوات ولكن رفض وفي هاي الفتره تزوج وحده ثانيه غيري وبعد سنتين من زواجه طلقها لأنها ما خلفتله اولاد! وقرر يتزوج الثالثه وانا ساعتها طلبت الطلاق وانفصلنا عن بعض وموضوع الاحتضان بذهني وناويه عليه ولكن شاء الله تعالى اني اتزوج مره ثانيه وربنا عوضني بزوج صالح ☺️ وصاحب خلق ودين وبعد سنتين من زواجي الثاني طرحت فكرة الكفاله ولكنه رفض واستمريت اقنعه لمدة سنتين لحد ما وافق من فضل الله تعالى. قدمنا الأوراق المطلوبة وكانت المعامله صعبه وتمشي زي السلحفاه وكأني بحفر بالصخر لكن ربنا رزقني اراده مثل الجبال الشامخه 💪🏻في موضوع الاحتضان ووصلت من فضل الله لقرار المشاهده روحت مع زوجي وكنت ناويه اخذ بنت وكنت اتفقت مع بنت اخت زوجي علشان موضوع الرضاعه.. وسبحان الله كلن في زوجين قبل ما ندخل شايفين طفله ولسه ما اعطوا القرار النهائي فيها ومباشر ه المشرفه جابت الطفله بحضني وساعتها الزوجين الي كانوا قبلنا خلص انا بدنا الطفله وجاءت الزوجه وأخذتها من حضني وسألت انا في بنات غيرها فكان الجواب لا وانه في طفل اسمه صهيب❤️ عمره ثمان أشهر او تسعه تقريبا وبعد ما جابته المشرفه خذت لحضني وانا متردده وقالت خذوا فرصتكم في التفكير وانا صامته تماما زوجي صار يحكي لي خلينا نفكر ونرجع مره ثانيه نظرت لصهيب ساعتها كان ماسك بحضني وحجابي بكل قوة وبشده لدرجة اني ما قدرت اشيله من حضني واخذه زوجي وقال خلينا نفكر بالموضوع احسن ، انا ساعتها قلت لا خلص انا موافقه سألني زوجي جوابك نهائي قلت له موافقه جواب نهائي❤️ وبدأت المعامله يادوب وحصل انه توفى والدي الله يرحمه وتركنا الموضوع من شدة الحزن على فراق بابا الله يرحمه ويغفر له يارب.. وبعد أشهر اتصلت وحده من صديقاتي تعرف بموضوع صهيب وتعرض علي انه في طفل جميل موجود حاليا وقالت عن صهيب طفل مزعج وعصبي واسمراني وانه بقدر اغير المعامله بسهوله قلتلها انا لا ابحث عن الجمال ولا الشكل انا فقط ابحث عن الأجر والثواب والاجر عل قدر المشقه وانا من الناس لايمكن اني اغير اختياري علشان شكل الإنسان أن الله لاينظر إلى صوركم ولكن إلى قلوبكم ❤️ ولايمكن اخذ ايديه الصغيره الي مسكت في حجابي ورجعت اكمل المعامله رغم الحزن الكبير على وفاة بابا الله يرحمه. وجاء قرار الاستلام ورحنا استلمنا صهيب وعملت له حفله لكل الأقارب ورضعته اختي والحمد لله رب العالمين ❤️ وحاليا هو نسخة في الشكل والخلق من زوجي ربي ما يحرمني من صهيب وابو صهيب وزادت عيلتي الصغيره قطعة السكر وضوى البيت بحركاته وضحكته الحلوة👨👩👦 " مش مهم يكون من صلبك ، المهم يكون ابنك "
يوميات ام محتضنة
السلام عليكم ورحمه الله وبركاته انا قصتي اني متزوجه من حوالي 18 سنه عن قصه حب 5 سنين من قبل الجواز وبعد شهرين جواز حصل اول حمل ومكملتش شهرين وحصل اجهاض وتكرر الموضوع مرتين تاني ومفيش نصيب ودخلنا في مشوار العلاج
يوميات ام محتضنة
مشوار العلاج اللي استمر معانا حوالي 3 سنين ومن بعده بدءت رحله الحقن المجهري اللي استمرت معانا حوالي 7 سنين تعب نفسي وجسماني ومادي رهيب في أثناء تلك الفترة . فكرت في التبني وعرضت علي زوجي ولكن مجرد البدء في العرض كان الرفض منه..!! وبعد حوالي 10 سنين من عمر جوازنا لقيت جوزي جالي في يوم وسألني ايه رايك نتبني بنت وافقت فورا ورحنا مع بعض دار الإفتاء وسالنا وعرفنه أن اسمه (كفاله) وليس تبني وبدء زوجي في تحضير كافة الأوراق المطلوبة وبالفعل حضرت لجنه للمنزل ووافقت وتم استخراج خطاب المشاهدة واللي وقتها مكناش عارفين هنعمل ايه ونختار ازاي ؟؟؟؟؟ فضلنا نلف تقريبا 3 أيام كل يوم نروح كذا دار فيهم دار كان فيها لا يقل عن عشر بنات في نفس السن اللي كنا بندور عليه حوالي شهرين وكل ما نشوف بنت نحس ان ربنا لسه ما ارادش أننا نلاقكى بنتنا لحد ما روحنا دار فيها بنتين واول ما دخلنا المشرفات وقتها رفضوا اننا ندخل الغرفه بتاعتهم وقاله هنجبلكم بنت تشوفوها الاول ونرجعها ونجيب التانيه .. وللعلم جوزي عمره ما شال اي طفل نهائي ولا حتي اولاد اخواته كان ديما بيقول اول عيل اشيله علي ايدي ابني ... ولما خرجت البنت الاوله وشلتها علي رجلي وهو قاعد يبص عاليها وهي معايا (ولما المشرفه خرجت ببنتي ❤️🙈ومن قبل ما يشوفها قالها هاتي البنت دي علي رجلي) وكانت تقريبا أقل من أسبوع وقتها فتحت عينها وقالتله انا بنتك بعنيها 😍😍😍وغمضت تاني ❤️ وهو قال هي ❤️دي في الوقت ده اخدنا الجواب وسلمنه وكنا في انتظار اللجنه علشان تحديد موعد الاستلام وقتها كان ظروف البلد بعد الثورة وحصل بعدها منع أي حد من استلام اطفال أقل من سنتين وخلال الفتره دي كنا دائمين الزيارة ليها وكنا جهزنه حاجتها واوضتها وعرفت اهلي وجوزي كمان عرف أهله والحمد لله الكل كان مرحب بيها وفضل جوزي بحكم بعض علاقته يلف لحد ما ارد الله بتغير القرار وتم تشكيل اللجنة ورحنا استلامنا البنوته وسبحان الله كانت دخولها في بيتنا غير كل حياتنا حتي رزقنا ربنا كرمنا اخر كرم بعد ما كان جوزي بيقولي ناجل علشان الإمكانيات ضعيفه رزقها كان واسع وربنا كرمه في شغله ووسع عليه والنهارده حبيبتي وروح قلبى وحياتى كلها في سنه اولى ابتدائي وناوين الايام دي نبدء نفهمها القصه واتفقنا مع بعض اننا اليوم اللي هو هيقولها فيه بعدها نخدها تخرج في مكان بتحبه وبعدها ناخدها ونروح بيها كذا دار كل اسبوع مره علشان تعيش معاهم وتلعب ونحسسها أنه عادي وسبحااان الله أن بنتى شبه جوزى بالظبط وهي غيرت حياتنا تغير سبحان الله في دفء وطمأنينة وحب ورزق وخير ربنا بيبعته لينا علشانها هي.. عاوزه اقولكم انى رضعتها رضعات مشبعات الحمد لله ده من كرم ربنا عليه ❤️ الخلاصه متيأسوش لو اي حاجه وقفت في طريقكم كملو الطريق للآخر واللي ناوى وخايف صدقونى ربنا اختاركم للاطفال ديه وكفايه احساس الامومه اللي هتحسيه اجمل احساس والام اللي ربت مش اللي ولدت وادعولي أن ربنا يهديها ويرزقنا برها 😘😘😘 " مش مهم يكون من صلبك ، المهم يكون ابنك " انتظرونا كل يوم #حكايه_جديدة وامل جديد وتحدي جديد .... تابعونا هننشر كل يوم تحدي جديد واسرة جديدة في مواجهة الناس والمجتمع وساعدونا ساهموا في نشر الوعي وتغير الفكر 💫💫⭐️💪🏻 "شعارنا " "من الممكن ان تُنجب ... ومن أصعب الاشياء ان تهب حياة لطفل "
يوميات عائلة
صباح الفل يا احلا واجمل انسانه خلوقه ومحترمه قبلتها في حياتي بصي يا يمني انا احتضنت بنوته زي العسل اسمها ميرنا انا خد القرار ده من ٣ سنين من ٢٠١٧ وعلي اقتناع جدا انا وزوجي مع العلم انا معايا ولادين ولد عمره ١١ سنه وولد عمره ٨ سنوات
يوميات عائلة h5>
بس شوفت كذا حاجه علي جروبات عندنا الاطفال المعثور عليها وبحكم اني ساكنه في وش المستشفي كان زوجي يشوفهم وهما واخدنهم بيدخلوهم الحضانات 😢حاجه توجع القلب اوي اطفال كتير والحمد الله هو اقتنع وكلمني وقالي انا موفق جدا نروح الشئوان ونتكفل ببنت وفعلا روحنا بس المديره الي كانت ماسكه هناك وقتها الله يسامحها ويغفرلها بقي وقفت الورق وميئستش خالص اروح تاني وتالت ورابع وخامس لحد ماتغيرت المديره وبقي في مديره تانيه وفعلا قبلت ورقي شهر ١١ اللي فات وطبعا عشان الكرونا والظروف الي ظهرت اتأجل الموضوع شويه ودخلت اللجنه و النهارده استلمتها استلمت فرحة عمري ❤️ والحمد الله فرحه متتوصفش خالص ولا تتحكي واحنا بنستلمها كاني بولد فعلا والله وفرحة اخواتها اما شافوها واعدو يقولو اخيرا طلعت من الحضانه😄 انا بشجع اي حد عايز ياخذ الخطوه دي صدقني مش هتندمي بل بالعكس هترحميهم من الي هما فيه هما وسطنا احسن بكتير يارب نكون سبب سعاده ليها وربنا يبارك لينا فيها وتكون سبب دخولنا الجنه يارب ... ادعولنا وادعو لاولادنا بالسعادة ربنا يبارك فيهم كلهم ... "مش مهم يكون من صلبك ، المهم يكون ابنك " تابعونا هننشر كل يوم تحدي جديد واسرة جديدة في مواجهة الناس والمجتمع وساعدونا ساهموا في نشر الوعي وتغير الفكر 💫💫⭐️💪🏻
حكاية ام واسرة
صباح الخير .. وكل يوم تحدي جديد وامل جديد⭐️💫 يوميات انهارده حكاية ام واسرة اخدو القرار من ١٢ سنه ❤️وحاليا بيحصدو ثمرة تعبهم وحبهم وحضنهم لينتهم 👨👩👧 سلام عليكم انا محتضنه وبنتي حاليا 12سنه ...بنت قلبي هي عمري كله بخاف عليها من الهواء الطاير ....
حكاية ام واسرة
بدءت بعد محاولتين حقن مجهري ومحصلش نصيب زوجي كان رافض اني احتضن وبعد نقاش اتفقنا وجهزنا الاوراق وتمت الموافقه ...❤️ بدءت البحث عن بنوته لااني بعشق البنات وبدءت رحله البحث مش هكدب عليكم قولت بنوته شعرها اصفر وعيون ملونه 🙄المهم بحثت كتير ولما قبلت بنت قلبي ضحكتلي اوي كان عندها 6شهور💫 خطفتني بجد خطفتني!! ولا بيضاء ولاشعر ولاعيون ملونه ولا اي حاجه من اللي كنت رسماها في دماغي ماهو انا مكتتش لسه عارفه يعني ايه بنتك هتناد مكنتش فاهمه يعني ايه رزقني الله حبها ❤️❤️❤️ قولت هي دي بنتي والحمد لله دخلت قلبي وحياتي غيرت دنيتي البيت نور بيها بقي ف حياه ف البيت كنت الأول انا وزوجي يكون ف مشاكل العاديه ديه بتاعت المتجوزين 😄 نسيت كل المشاكل وبدءت اول الطريق مع بنتي حبيبتي وكبرت أمام عيني يوم بعد يوم لغايه ما بقيت 12عام ماشاء الله ومش عوزه اقولكم هي عباره عن صوره مصغرها مني ...يعني العرق مش دساس ولا جينات ولا اي حاجت من كل ده الأم اللي مش تخلف بنتي نسخه من من صفات وسلوكيات وحتي الافكار بنفكر زي بعض ❤️ بنتي حبيبتي خلتني مفكرش بموضوع الانجاب تاني نهائي نورت حياتنا وبقيت كل دنيتي مقدرش ابعد عنها وهي مرتبطه بيا جدا ... وهتفضل بنتي وحته من قلبي ... ربنا يقدرنا وتكون عروسه جميله وزي ما بتحلم وتتمنى ناجحه في حياتها وسعيده .... "مش مهم يكون من صلبك ، المهم يكون ابنك "
اسرة عبدالرحمن وعمر
مكنش حاجه مخوفنا الحمد لله اغلب العيله كانت متقبله الفكره بس مجرد فكره ولما بدانا نجهز الاوراق مقلناش لاي حد خالص لحد ما شفنا عبد الرحمن ❤️ بدانا نحكي لأهلنا اول ناس كانت رديت فعلهم متوقعه نوعا ما
اسرة عبدالرحمن وعمر
دانا نحكي لأهلنا اول ناس كانت رديت فعلهم متوقعه نوعا ما بين خوف وقلق مش رفض بس اكتر ناس حسيت انهم فرحانين من قلبهم منغير خوف ولا قلق اخواتي الصغيرين واخت جوزي الكبيره شفت في عينهم فرحه رهيبه بس باقي اهلنا لما جم معانا الدار.. وشافو عبد الرحمن مكنش في اي حاجه شغلاهم غير هيجي امتى والقيهم بيكلموني يقوليلي وحشنا اوي عايزين نروح لدرجه ان كنت مره عند عبد الرحمن ولقيت البنات فالدار بيقولو في زياره جايه لقيتهم قرايبي كلهم وعيالهم😂 قولتلهم لا دي زياره لعبد الرحمن مخصوص وفضلنا كده لحد ما جاه البيت يوم8/1/2016 وعملناله حفله وعزمت العيله كلها الحمد لله.. وبعدين شوفنا عمر وقررنا نحتضن تاني وكانت المواجهه المره دي اصعب !! بكتير علشان ليه ؟؟كان رد اللي حوالينا ليه ماخلاص كفايا واحد وقولو الحمد لله كلام كتير... لحد جم الدار وشافو عمر خلاص برضو فضلو يسالوني جاي امتى عايزين نشوفو😂😂 لحد يوم1/8/2018 عمر جاه البيت وعملناله حفله زي عبد الرحمن بالظبط❤️ الحياه اتغيرت خالص بقى فجاه في اتنين بيخانقو مين ينام فحضني البيت الهادي الساكت اللي حاجه بتفضل فمكانها ايام ويمكن شهور مبقاش في حاجه فمكانها لدرجه ان اختي الصغيره مره قالتلي بيتك بقى في حياه بقى دوشه اووي😂😂 المهم يعني ان الناس مينفعش يكون ليهم تاثير فقرارتنا ابدا! محدش هيحس بحياتكم غيركم مره حد قالي ازاي مش خايفين ده الجينات بتاعتهم؟! قولتهم مكنش سيدنا نوح ابنه كفر وسيدنا إبراهيم ابوه كفر.. ! شخص تاني برضو قالي ان انتو بس عايزينهم علشان تبقو زي كل اللي حواليكم وتكملو صوره مش اكتر قولتلو وماله بس خد بالك عمر الصوره ما بتكمل بالعيال في كتير عندهم عيال ومش راضين عن عشتهم الحياه بتكمل بالرضا بالابتلاء ومش بس كده احنا حبينا ابتلاءنا 😍 .. طيب خلاص اصرفو عليهم وهما فالدار بلاش يجو البيت؟! قولتلهم الكفاله مش فلوس بس فين الحب والتربيه الحضن العيله يروح مدرسه يحكي عن بابا وماما والبيت زي اي طفل ملهوش اي ذنب فاي حاجه .. دايما كان عندي ثقه ان ربنا مخلقناش علشان يعذبنا ابدا بالعكس يعني احنا معندناش ولاد في ولاد معندهمش بيت ولا عيله ميعرفوش معنى الدفا اكيد ربنا لي حكمه فكده ولما نهدى ونفكر بنلاقي ان قدر ربنا كله خير لينا بالعكس متخيلش ازاي ممكن تكون حياتي من غير عبد الرحمن وعمر هما احلى قدر ربنا يسرهولي الحمد لله ❤️❤️
قصه ليلى
#يوميات ام مختلفة قوية وسعيدة ... مريت بخوف كتير بس قدرت تواجه خوفها وقررت انها عايز تكون #مامت_ليلى .. ورزقها الله ليلى❤️
قصة ليلى
انا مامت ليلى لم اتزوج بعد ولكن رزقني الله حياة مختلفه تمنيت الأمومة مع كل طفل تعاملت معه في عملي يوميا إلى أن هداني الله الفكرة من سنتين وبدأت في اجراءات الكفاله وسهل الله لي الأمور وانهيت الإجراءات وانتظرت الموافقة. وكانت من أصعب اللحظات لقلبي وقت ما سمعت تلك الكلمات ( تمت الموافقة تعالي استلمي جواب المشاهدة) ذهبت بمنتهى القوة والإصرار رغم تحديات كثيرة قابلتها وضغوط من الأسرة والأصدقاء بأن هذه الخطوة ليست هي القرار الصائب ولكن شيء بداخلي يدفعني لاستكمال ما بدأت واستلمت الخطاب ! وكانت اصعب لحظة! تحدثني نفسي انتي الان مسؤوله عن حياة أخرى هل انا على حق؟ هل انا على قدر المسؤولية؟ وبدأت رحله البحث ولم يوفقني الله رحله استمرت سنتين لكن مع كل طفله أراها كنت احس بأن كل الاطفال سواء لم يجذبني شيء بعد .. وكنت أسمع كلمة واحدة فقط ( ابنتك هي التي سوف تختارك ) كنت انتظر إشارة معينة لا اعرف ما هي ولكنها لم تأتي بعد كان احساسي بتسليم لقضاء الله وان لتاخيره حكمه لا يعلمها الا هو وكنت اطلب منه دائما أن يرزقني طفله تفتح عيونها علي اني أمها❤️ لا تعرف غيري إلى أن ...وبعد مرور سنتين وبطريقة الصدفه يفتح الموضوع مرة أخرى وذهبت لزيارة روتينية جدا لدار ايتام ولم تكن الزيارة لاختيار طفله ابداً.. رأيت هناك اطفال من عمر ايام إلى عمر ٣سنوات ومررت بجانب سرير تغفو فيه طفله عمرها شهرفقط تنام على بطنها ولم أر وجهها ولكن لمستها بيدي لاطبطب عليها، وكانت تلك اللمسة السحرية ❤️⭐️💫 عندما حملتها نظرت إلى بعيونها التي لم تكن ترى بهما بعد فمازال عمرها ايام وكأن بيننا سابق معرفه سالتها على اسمها؟ لارى على وجهها اجمل ابتسامه حين سمعت صوتي سبقتني دموعي وقلت لها لم تريني بعد فما زلتي لم تميزي الإشكال... ولكن ارواحنا التقت وكانت هذه الابتسامه هي المفتاح حضنتها بين ذراعي وحدثني قلبها بأنها هي ابنتي قالت لي من اول يوم (سأنتظرك) !! هي أيضا عرفت اني امها وأخذت القرار معي خرجت من هناك لأكون في اليوم التالي في الوزارة لإنهاء الإجراءات مرة أخرى وعرفت وقتها أن انتظاري هذه المدة لأن ابنتي لم تكن ولدت بعد😊 وجاء اليوم الحاسم ورجعت بها إلى البيت بعد شهرين من الانتظار👩👧 الان انا ام تتنفس الصغيرة هوائي وتعيش بعالمي نامت اول ليله وكأنها تعرفني جيدا لم تستيقظ طوال الليل وكأنها تعلم أنها وصلت إلى بيتها اخيرا.. "" تعبرين جيدا يا صغيرتي وتخبريني باحساسك بكل طريقه ممكنة (احبك) ❤️ وتمر الايام واراها تكبر أمام عيني تفاصيلها تبهرني تشبهني بطباعها وتفاصيلها وكأنها من رحمي اعيش الان اسعد لحظات حياتي"" صغيرتي: اتمنى أن اكون ام تستحقيها كما كنتي انتي لي الدعوة التي طلبتها من الله ووهبني إياها انتظرتك وكنتي احلى مما اتمنى احبك❤️👩👧
اسرة محتضنة
يوميات ومشاعر وحكايات الخالات والعمات الاعمام والاجداد ❤️ الوجه الاخر من قرار الكفالة الاهل والاحباب مشاعرهم ورأيهم ... مهم جدا نشاركم مشاعر كل فرد في عيلة كبيرة رزقها الله بحفيد باابن محتضن ❤️
اسرة محتضنة
السلام عليكم ورحمة الله جميعا انا يمكن مش البطله ولا صاحبه القصه لكن هتكلم عن دوري الصغير اووي فيها انا ليا اخت اصغر مني اتجوزت بعدي بفتره صغيره مع ولاده ابني التاني. واختي دي اقرب انسانه ليا في الدنيا اختي وصديقتي وبعد زواجها بشويه في الانجاب . بدات رحلتها في الحقن المجهري والبهدله بتاعته وكانت بتاخد محاليل لتقليل المناعه واحيانا فرط تنشيط واشعه صبغه وبهدله صحيه ونفسيه وكذا مره يحصل حمل ومايكملش ويوصل للشهر التالت ويتوفي كنت زعلانه عليها وقلبي واجعني غير للاسف استغلال الجميع ليها ولموقفها الاجتماعي طالما انتي من غير اولاد يبقي البهدله وعدم احترام الخصوصيات والتنمر هو قدرك وحليفك من بعض الاهل قبل الغريب ... واستنزافك صحيا وماديا بدون التفكير فيها ابدا وكنت بزعل عليها واحاول ارد عشان محدش يضايقها و عدت حداااااشر سنة، لحد مافي يوم كل ده اتغير جات وحكتلي انها بتفكر تكفل وتحتضن طفل انا استنكرت الموضوع في الاول، بس هي اقنعتني وردت علي كل التساؤولات اللي انا كنت بفكر فيها وسبحان الله بقت الفكره في بالي وقالتلي لما هروح اختار هاخدك معايا بقيت فرحانه ونفسي ييجي اليوم اللي احس فيه انها مستقره وليها حياتها وبيتها زي اي واحده متزوجه وسبحان الله الاجراءات خلصت وتمت جه اليوم اللي المفروض تروح تختار فيه ورحنا انا وهي الصحه عشان تختار ولما دخلنا شوفنا الاطفال حوالي 5 و6 شهور علي الارض ومنظرهم يوجع القلب اوي.. وكان بينهم واحد الاخصائيه بتحاول تقنعها بيه بس هي قعدت تبص للاطفال كلهم ومش حاسه بحاجه وبعد كده واحده جابتلها بيبي من جوه عنده شهرين تقريبا هي اول ماشافته وانا متتبعاها حسيتها عامله زي الغريق اللي ماصدق ولقي حد ينقذه اللي نفسه مكتوم وفجأه عرف يتنفس بعمق، ❤️ شالته وقعدت تعيط وهو يبص ليها بصات غريبه ومركز جداااااا انا عمري ماشوفت كده وسبحان الله كان جميل اوي و الغريبة انه فيه حاجة منها و من زوجها وهي قعدت وشايلاه وهو ماسك فيها بايده ويبص عليها بصات مش هنساها وهي تعيط وتحضنه ⭐️⭐️ حسيت وقتها ان مش هي اللي بتحتضن الطفل ده لا والله العظيم هو اللي احتضنها هي محتاجه ليه اوووووي ولكن للاسف مكنش ينفع تاخده عشان اقل من 3 شهور وهي نزلت من عنده بتقولي انا بحبه اكتر واحد في الدنيا وتعيط وزعلانه انها مخدتش معاها "كوكي وكل زياره نروح وتصوره و تصور نظراته واول ضحكه واول حضن واول كل حاجه وتكلمه انا ماما انت عارف اني ماما ❤️ وهو يضحك ضحكات تلقائية جميلة وفرحان لدرجة اني بكيت من منظرهم وحسيت ان حياتها بدات وفضلنا من زياره لزياره لحد ماجه اجمل يوم في حياتنا كلها يوم استلام كوكي" اللي انا بعتبره اجمل نعمه ربنا رزقنا بيها في الدنيا وان شاء الله في الاخره . يوم الاستلام عدي والكل رحب وفرح من الاهل والصحاب والقرايب وسبحان الله كل اللي يشوفه يقول شكل مامته وباباه وان ربنا فعلا عوضها عوض جميل " وكوكي جه ونور دنيتنا وفرحنا كلنا وهي بقت مشغوله بيه وكل حاجه حلوه تشوفها تقول دي "لكوكي " انا فرحانه بيه وبيها وبحياتها اخيرا اطمنت عليها وارتحت انا خالتو "ياكوكي" 😄وبقولك انك اجمل واحلي واغلي هديه ونعمه ورزق ربنا رزقنا بيه ويارب يقدر مامتك وباباك ويقدرنا كلنا ونصون النعمه دي ونحافظ عليها “مش مهم يكونوا من دمكم ، المهم يكونوا منكم " انتظرونا كل يوم #حكايه_جديدة وامل جديد وتحدي جديد .... تابعونا هننشر كل يوم مشاعر جديد لكل افراد عائلة محتضنه وساعدونا ساهموا في نشر الوعي وتغير الفكر 💫💫⭐️💪🏻
All Rights Reserved. © 2022 Kafala in egypt Developed By: ahmed sobhy